بعد ما ثورنا وشيلنا الغول .. جينا بأعلى الصوت بنقول
نفسنا بقى فى مرشح طازة .. كفرتونا من أكل فلول
****
أوعى تكون فزلوك مجنون .. وتقولى سياسى ومضمون
دا اللى بتحسبه طيب ( موسى ) راح يطلع أكبر فرعون
****
عايزين واحد عقله ( سليم ) .. عفريت ( عو ) على الملعون
مش فل فى طيارة قديم .. عيل شيرز أوى وبنبون
****
وأوعى ترشح شاهد زور.. وتفكر هتعيش فى أمان
(شريعتنا هى الدستور .. حل بدون خاتم ( سليمان
****
عايزين واحد عنده ( فتوح ) ومواجهات ثورية قديمة
لهو حوراتى ولا مخابراتى وواقفلى وراه ممثل سيما
****
وإياك تنسى جِمال الفجرة وتقولى ميعرفش برئ
يا جماعة إحنا لغينا الكورة فمينفعش تجبلى فريق
****
عايزين واحد ( حازم ) أمره .. ثابت مش بياع حوارات
دينه ( صلاحه) ومنبر عمره .. مهماً قالوا عليه إشاعات
****
ويكون (خيّر) أوى ومحنك (شاطر) جداً فى التطوير
إخوان بيطيبوا أوجاعنا وبينجحوا من غير تزوير
****
أنا هنجز فى كلامى وألخص .. وأدعى يا رب يكون بقى هوه
.راجل- مسلم- عبقرى- مخلص.. منعم، حازم، خيرت، عوا
بقلم : خالد المصرى